ئەو ئاگرەی کۆرمۆر ئاگرە لەشوێنێکی دیکە، پارتی باش لەم پەیامە تێدەگات، یەکێتیی و پارتی باشتر لەهەمووان لەیەکتر تێدەگەن. ئەگەر لەسەر پێکهێنانی حکومەتی هەرێم و دابەشکردنی پۆستەکانی بەغدا رێکنەکەون ئاگرەکە گەورەتر دەبێت. چارەسەریش بەدژە درۆن ناکرێت، بەڵکو رێککەوتنی پارتی و یەکێتییە.
چەند رۆژێکە لەسلێمانیی بەتایبەت لەناو یەکێتیی ناڕاستەوخۆو لەبن زمان باس لەئەگەرو خواستی دوو ئیدارەیی دەکرێت، ئەم تێگەیشتنە هەڵەیەکی کوشندەیە، هەڵەیەکە مێژوو ئایندەی ئەم نیشتیمانە دەخاتە ژێر پرسیار، واباشە یەکێتیی باسی شۆڕکردنەوەی دەسەڵات بکات نەک دوو ئیدارەیی. چونکە کوردستان موڵکی هیچ حزبێک نییە، هیچ حزبێکیش نەلەکوردستان و نەلەبەغدا نوێنەرایەتی خەڵکی کوردستان ناکات.
هێزە شیعەکان بەنزیکەی ٦٠%ی دەنگەکانی دەنگدەرانی عیراقیان بەدەستهێناوە، بەڵام قەت بیریان لەوەنەکردۆتەوە هەرسێ سەرۆکایەتیەکە بۆخۆیان ببەن، پشکی کوردو سوننەیان جێهێشتووە بۆخۆیان، چونکە دەزانن لەم واقعە زۆرینەی پەرلەمانیی بۆ پَکهێنانی حکومەت پێوەر نییە، کەچی پارتی تەنها لە٢٠%ی دەنگەکانی کوردستانی هەیە دەیەوێت سەرۆکی کۆمارو سەرۆکی هەرێم و سەرۆکی حکومەت ببات! بێ رەچاوکردنی هەقیقەتی تاڵی نەبوونی دیموکراسی و هاوکات خواستی لایەنەکانی دیکە بۆ دەسەڵات و هاوسەنگی هێزو نفوزی ئیقلیمیی! عینادی کردنیش لەگەڵ تواناو واقع، ئەنجامی زۆر خراپی لێدەکەوێتەوە، لەچەند ساڵی رابردووش چەندجارێک تاقیکراوەتەوە.
پارتی ئەگەر بۆ بەدەستخستنی پۆستی سەرۆک کۆمار گرەو لەسەر رێککەوتن لەگەڵ نوری مالکی دەکات ئەوا هەڵەیەکی زۆر گەورە دەکات، چونکە نوری مالکی وا ناتوانێت خۆی بکاتەوە سەرۆک وەزیران،! ئەمە گرەوێکی سەرکەوتوو نییە. کوردیش گوتەنی کەچەڵ خۆی تەبیب بوایە عیلاجی سەری خۆی دەکرد.
خولاسەی کەلام، بەهۆی عینادیی و تامەزرۆیی دەسەڵات، کوردستان چۆتە گەڕێکی بێ پسانەوەی ململانێی ناوخۆیی و ئیقلیمیی. گەڕی ئەمجارەش، ململانێیە لەناو بازنەیەکی داخراو کە کوردستان زیاتر بەرەو دواوە دەبات، خەڵکی کوردستان زیاتر بێئومید دەکات. چونکە کاتێک دیموکراسی نەبوو، ئیدی نە هەڵبژاردن و نە دامەزراوەکانی حوکمڕانیی هیچ ئەرزش و بەهایەکیان نامێنێت.
هەقیقەتێکی تاڵ هەیە کە کوردستان لەم قۆناغەدا کوردستان لەڕێی دیموکراسی و زۆرینەی پەرلەمانیی بەڕێوەنابرێت، چونکە سەرکردایەتی حزبەکان بەگشتیی بڕوایان بەدیموکراسی نییە.
مخابن کە دەستوەردانی ئیقلیمیی، چەک و هێزی ئەمنی و حومگەکانی حوکمڕانیی و دارایی لای حزب، رێگری سەرەکیی گەشەکردنی کۆمەڵگای کوردستانن. ئەمە وایکردووە فەرهەنگی زۆرینەی خۆسەپێن و کەمینەیەکی دیکتاتۆر دروست ببێت کە لەئەنجامدا ئەگەر رێککەوتن یان تەوافوق و سازان نەکرێت بەدڵنیاییەوە پشێویی و ناسەقامگیریی دروستدەبێت.
گرەوکردن لەسەر فاکتەرەکی ئیقلیمیی یان دەرەکیی (شیعە یان سوننە) بۆ بەدەستخستنی پۆست یان بەدەستهێنانی خواستی حزبیی، گرەوێکی شکستخواردووە، کورتبینی سیاسیە، ئەو سازشەی بۆ لایەنی دەرەکی دەیکەن، بۆیەکتری بکەن زۆر بەهێزتر دەبن و دەستکەوتەکانیش زۆر زیاتر دەبن.
.