بەهۆی خۆڵبارینەوە لە ئێران سێ کەس گیانیان لەدەستدا
میدیاکانی ئێران بڵاویانکردووەتەوە، بەهۆی خۆڵبارین لە پارێزگای سیستان-بەلوچستانی لە باشوری رۆژهەڵاتی ئێران سێ کەس گیانیان لەدەستداوە و زیاتر لە هەزار کەسی دیکەش بۆ وەرگرتنی چارەسەر رەوانەی نەخۆشخانە کراون.
بەرپرسی بەڕێوەبردنی قەیرانەکان لە پارێزگای سیستان-بەلوجستان رایگەیاند، زیاتر لە سێ کەس لە پارێزگاکەیان لە باشوری ڕۆژهەڵاتی ئێران بەهۆی زریانی خۆڵ و تۆزەوە گیانیان لە دەستداوە و ژمارەیەکی دیکەش گەیەندراونەتە نەخۆشخانەکان.
ئاماژەی بەوەشکرد، زیاتر لە هەزار و ٣٠٠ کەس بەهۆی خۆڵبارینەکەوە توشی نەخۆشییەکانی کۆئەندامی هەناسە و دڵ و چاو بوون و بۆ وەرگرتنی چارەسەر رەوانەی نەخۆشخانە کراون.
پێشبینییەکانی ناوەندی کەشناسی ئێران ڕایگەیاندوە، پێشبینی دەکەن بای بەهێز و زریانی خۆڵبارین بۆ چەند ڕۆژێک بەردەوام بن.
|