فێستیڤاڵی نێودەوڵەتیی گەلاوێژ لە سلێمانی دەستپێدەکات

بڕیارە ئەمڕۆ بە ناونیشانی "لە پێناوی شکۆی وشە، گەلاوێژ بەردەوامە"، ٢٧ەمین خولی فێستیڤاڵی گەلاوێژ لە شاری سلێمانی دەستپێدەکات.

ئیبتیسام ئیسماعیل، سەرۆکی بنکەی روناکبیریی گەلاوێژ لەبارەی دەستپێکردنی فێستیڤاڵی گەلاوێژ رایگەیاند: فێستیڤاڵەکە چەندین چالاکیی هونەری و ئەدەبی لەخۆدەگرێت، چەندین خەڵات پێشکەشدەکرێت یەکێک لەوانە خەڵاتی زێڕینی کوردستانە کە بە ئەدیبێکی بیانی دەدرێت و خەڵاتی زێڕینی گەلاوێژ بە ئەدیبێکی کورد دەدرێت، جگە لە خەڵاتەکانی پێشبڕکێی گەلاوێژ کە خەڵاتی یەکەم و دووەم و سێیەمە بۆ شیعر، چیرۆک لێکۆڵینەوە. 
 
ئاماژەی بەوەشدا: لە یەکەم رۆژی فێستیڤاڵەکەدا کۆنسێرتی گۆرانیی هونەرمەند دیاری قەرەداغی بەڕێوەدەچێت و شاعیری کورد جەمال غەمبار شیعر پێشکەشدەکات. 
 
وتیشی: فێستڤاڵەکە ١٨٠ میوانی لە ناوخۆ و عێراق و وڵاتانی دیکەوە هەیە، کارەکانی ٢٧ەمین فێستیڤاڵی گەلاوێژ لە رۆژی ٥ تاوەکو ٧ی کانوونی یەکەم بەردەوامدەبێت. 
 
لە کۆتایشدا باسی لەوەشکرد: لەنێو فێستیڤاڵەکەدا پێشانگایەکی کتێب دەکرێتەوە لەگەڵ پێشانگایەکی دەستڕەنگینیی ژنان و پیاوان.