وەزارەتی دەرەوەی ئیسرائیل لە ڕاگەیەندراوێکدا ئاماژەی بەوەکردووە، تورکیا بە بەرنامە چووتە ناو خاکی سوریاوە، وە ئەو پرۆسەیە لە 2016، 2018، 2019 دەستپێکردووە و هەتا ئەمڕۆش بەردەوامە، ناوچەی دروستکردووە بۆ گروپە چەکدارەکانی لە بری ئەو کاردەکەن، وەکو لەشکری نیشتمانی سوریا کە لە ژێر کۆنترۆڵی خۆیدایە.

دەشڵێت، لە ئێستادا نزیکەی %15ـی خاکی سوریا لە ژێر کۆنترۆڵی ئەو هێزانەن کە تورکیا پاڵپشتییان دەکات. لەو ناوچانە کار بە لیرەی تورکی دەکرێت و بانک و پۆستی تورکی کاردەکەن.

وەزارەتی دەرەوەی ئیسرائیل ئاماژە بەوەشدەکات، جگە لەوانە، لەشکری تورکیا بە فڕۆکەی جەنگی و درۆن ژێرخانی ناوچەی بەڕێوەبەرایەتی خۆسەر لە باکوری ڕۆژهەڵاتی سوریا بۆردومان دەکات، و سوپای توركیا پشتیوانی ئەو هێزە جیهادییانە دەكات كە دژی كوردی سوریان.

لە ڕاگەیەندراوەکەی وەزارەتی دەرەوەی ئیسرائیلدا هاتووە، دوایین وڵات بۆی هەبێت قسە لەسەر داگیرکاری لە سوریا بکات، تورکیایە کە 15% ی خاکی سوریا لە ژێر دەسەڵاتی گروپەکانی لە بری ئەو کاردەکەن و لە ژێر کۆنترۆڵی خۆیدان. هیچ پاساوێک نییە بۆ بەردەوامبوونی دەستدرێژی و توندوتیژی لە لایەن تورکیاوە لە دژی کوردەکانی سوریا.