دوای ٣٥ ساڵ، ببینن هەرێمی کوردستان پەرلەمانی نییە، حکومەتی ماوە بەسەرچووە، هێزێکی پێشمەرگەی یەکگرتووی نییە، دامەزراوەکانی ماوەیان بەسەرچووەو هیچ پێناس و ناونیشانێکی نییە.
ناوچەدابڕاوەکانی لەدەستداوەو خەڵکی ئەو ناوچانە کە قوربانییەکی ئێجگار زۆریان لەپێناو نیشتیمان داوە، نەک خۆزگەناخوازن بگەڕێنەوە، بگرە شوکرانەدەکەن لەژێر حوکمڕانی هەرێم نین! چونکە ئێستا ئەوانیش لەکولەمەرگی دابوون! لەباتی ئەوان خۆزگە بەژیانی هەرێم بخوازن، ئێستا خەڵکی هەرێم خۆزگە بەژیان لە ناوچە دابڕێنراوەکان دەخوازن. چونکە دەبێت لیتری بەنزین بە دوو هەزار بکڕن، نەوت بە ٢٥٠ هەزار بکڕن، غاز بە٢٠ هەزار بکڕن، کارەباو ئاو گران بکڕن، بچنە هەر فەرمانگەیەکی حکومەت لەدەرەوەی یاسا کۆشێک پارە بدەنە حکومەت..تد.
لەهەمووی خراپتر، ئەم هەرێمە، کە رۆژانێک بوو حوکمڕانانی بەنەوت و گازەکەی دەیانخوڕی، ئێستا ئەویشی وەک پێویست لەدەستنەماوە. واتە نەوت و گازەکەی دراوە بەکۆمپانیاکان و ئێستا لەئیرادەی حکومەتی هەرێمدا نەماوە. ئەمڕۆ دانە گاز بەرەسمیی و بەبێ گەڕانەوە بۆ حکومەتی هەرێم دەستیکرد بەفرۆشتنی گاز بەحکومەتی عیراق.
وەزارەتی سامانە سروشتییەکانیش بەیاننامەیەکی شەرمنانەو شەرمەزارانەی دەرکردووە، بێ ئیرادەیی خۆی بەیان دەکات و تەنها گلەیی دەکات بێ ئەوەی هیچی پێبکرێت. ئێستا لەباتی حکومەتی هەرێم کۆمپانیاکان گفتوگۆ لەگەڵ بەغدا دەکەن.
سەد مخابن، ئەو نەوتەی دەبوو ببێتە سەرچاوەی هێزو ژیاندنی هەرێم و دابینکردنی موچەو بژێوی خەڵک، ئێستا کۆمپانیاکان داهاتەکەی دەبەن، سەرباری رادەستکردنی نەوتیش، کەچی بەغدا هێشتا موچەکە بەسەرگرانییەوە دەنێرێت. ئەمە لەکاتێکدا نەوت و گاز سامانێکی ستراتیژیی نەوەکانی داهاتووی کوردستانە، کەچی حوکمڕانان کردیانە قوربانیی کۆشک و تەلارو مانەوەی خۆیان، هەڕاج و شاباشیانکرد.
لەباتی ئەم قەوارەیە بەهێزبکات، نەوتەکەیان کردە تەوقێک، هەرێم و خەڵکی کوردستانیان پێ کردە دیلی کۆمپانیاکان! وڵاتێکیش سەرخان و ژێرخانی وێران بێت و خاوەنی سامانی سەرزەوی و ژێرزەویەکەی نەبێت، تازە سەربەخۆییەکەی بۆچییە؟
بەپێی ئەو دیمەنەی ئێستا دەیبینین، ئەم هەرێمەی ئێمە کە خەونمان بەئایندەکەیەوە دەبینی، لەباتی سەربەخۆبوون و گەیشتن بەکەناری ئارام و ئاوەدانیی، کەچی نەک ئێستای بەڵکو ئایندەشی تاریک و وێرانکراوە.
حوکمڕان و شۆڕشگێڕەکانی دوێنێی سەرزەوی و ژێر زەویان لێ هەڕاجکردووین، لەباتی ئاوەدانیی، هاتوینەتە سەر ساجی عەلی.