سەرۆکی یەکێتیی نیشتمانیی کوردستان ئیدانەی تەقینەوەکانی شاری کرمان دەکات و رایدەگەیەنێت، ئەرکی ھەموولایەکە بە یەکگرتووییەوە ھەوڵەکان بۆ رووبەڕووبوونەوەی تیرۆر و تیرۆریستان یەکبخەن.
بافڵ جەلال تاڵەبانی سەرۆکی یەکێتیی نیشتمانیی کوردستان پەیامێکی بڵاوکردەوە و رایگەیاند، بە توندی ئیدانەی ھێرشە تیرۆریستییەکەی شاری کرمان دەکات و پرسە و ھاوخەمیی قووڵی خۆیان ئاڕاستەی گەلی ئێران و کەسوکاری قوربانییەکان دەکات.
ھەروەھا جەخت لەوەدەکاتەوە، ئەرکی ھەموولایەکە بە یەکگرتووییەوە ھەوڵەکانیان بۆ رووبەڕووبوونەوەی تیرۆر و تیرۆریستان یەکبخەن و ئاسایش و سەقامگیریی ناوچەکە بپارێزن.
ئاماژەی بۆ ئەوەشکردووە، یەکێتیی نیشتمانیی کوردستان ھاوسۆزە لەگەڵ کۆماری ئیسلامیی ئێران و ھیوای زوو چاکبوونەوە بۆ بریندارەکان دەخوازێت.