كامەران عوسمان لێپرسراوی بەشی مافی مرۆڤ لە ڕێكخراوی سی پی تی ئەمریكی رایگەیاند، لە کاتژمێر 10:36 خولەکی دوێنێ شەودا، فڕۆکە جەنگییەکانی تورکیا بە چڕی بۆردوومانی چیای کوڕەژارۆیان لە شارەدێی شیلادزێ لە قەزای ئامێدی کرد. دواتر لە کاتژمێر 2:20 خولەکدا، سەربازانی تورکیا لە بارەگا سەربازییەکانیانەوە تەقەیان بەڕووی گوندی بیریا شیخۆ لە دامێنی چی کوڕەژارۆدا کرد. یەکێک لە فیشەکەکان بەر ماڵی هاووڵاتییەکی مەدەنی بەناوی (بەختیار محەمەد ڕەسوڵ) کەوت. ناوبراو خێزاندارە و خاوەنی دوو منداڵە و سەرجەمیان لە خەودابوون کاتێک فیشەک لە جامی پەنجەرەکەیانەوە چووە ژوورەوە.

ئاماژەی بەوەشکردووە،  پێش نیوەڕۆی ئەمڕۆش، لە کاتژمێر 10:15 خولەکدا، تۆپخانەکانی تورکیا لە چیای مەتیناوە تۆپبارانی بەری نزارکێیان لە چیای گارا کرد، هیچ هاووڵاتییەکی مەدەنی نەبۆتە قوربانی، بەڵام هێرش و بۆردوومانەکان دڵەڕاوکێیان بۆ دانیشتووانی ناوچەکە دروستکردووە.