وەزارەتی دەرەوەی عێراق لێدوانەکانی سەرۆکوەزیرانی ئیسرائیل سەبارەت بە "ئیسرائیلی گەورە"ی بە توندی ڕەتکردەوە و ڕایگەیاند ئەم لێدوانانە پێشێلکردنی ئاشکرای سەروەریی وڵاتان و یاسای نێودەوڵەتی و جاڕنامەی نەتەوەیەکگرتووەکانن.
وەزارەتی دەرەوەی عێراق لە بەیاننامەیەکدا ڕایگەیاند، "ئەو لێدوانانەی قەوارەی داگیرکەر سەبارەت بەوەی پێی دەوترێت "دیدگای ئیسرائیلی گەورە" بە روونی تەماحە فراوانخوازییەکانی ئەم قەوارەیە ئاشکرا دەکات و هەوڵەکانی بۆ تێکدانی ئاسایش و سەقامگیریی ناوچەکە پشتڕاست دەکاتەوە".
لە راگەیاندراوەکەدا هاتووە، وەزارەت پێی وایە کە ئەم لێدوانانە گاڵتەکردنێکی ئاشکران بە سەروەریی وڵاتان و پێشێلکارییەکی زەقی یاسای نێودەوڵەتی و میساقی نەتەوە یەکگرتووەکانن، ئەمەش پێویستی بە هەڵوێستێکی ڕوون و یەکلاکەرەوەی عەرەبی و نێودەوڵەتی هەیە بۆ ڕووبەڕووبوونەوەی سیاسەتی لەم شێوەیە.
وەزارەتی دەرەوەی عێراق جەختیشی کردووەتەوە، " ئەم لێدوانە بێشەرمانە هاوکاتن لەگەڵ بەردەوامیی دەسەڵاتدارانی داگیرکەر لە پەیڕەوکردنی سیاسەتی دەستدرێژی و ئەنجامدانی تاوان دژی گەلی فەڵەستین".